गीति समीक्षा गर्न हङकङकमा भूपाल राई

एविसि खबर
काठमाडौं, २७ भदौ । नेपाली साहित्यका वरिष्ठ कवि तथा गीतकार भूपाल राईले रबिन बान्तावा खाहोङ राईद्वारा लिखित पुस्तक ‘गीत सागर’को विमोचन गरेका छन् । हङकङस्थित समीक्षक समाजले आयोजना गरेको गीति विमर्श कार्यक्रममा सहभागी हुन पुगेका उनले नयाँ पेजको कार्यालयमा आयोजित कार्यक्रममा पुस्तकको विमोचन गरेका हुन् ।

समीक्षक समाज हङकङका संयोजक गीतकार हेम लावती, वरिष्ठ संगीतकार दिनेश सुब्बा, गायक चेतमान गुरुङलगायतले उनलाई विमोचनमा साथ दिएका थिए । कार्यक्रमको प्रमुख अतिथिसमेत रहेका भूपालले आफ्ना गीतसंगीतको संघर्ष र कवितामा गरेका संघर्षहरू सुनाएर उपस्थित माहौललाई कहीँ सन्नाटा र कहीँ हाँसोका फोहोरा छरिदिएका थिए । उनले आफू अस्वस्थ रहे पनि करिब १ घन्टा धाराप्रवाह गीति लेखनसम्बन्धी बोलेका थिए । उनले कार्यक्रममा बोल्दै सीमान्तकृतको आवाज उठाउनेमा २० को दशकमा वैरागी काइँला एक्लै रहेका, ४० को दशकमा आफूले सो मुद्दा एक्लै उठाउँदा सत्ता संयन्त्रबाट असुरक्षितसमेत महशुस गर्ने गरेको सुनाएका थिए । ५० को दशकपछि आएका युवाहरूको साथले आफूलाई सान्त्वना मिलेको भन्दै अहिले आफूहरूले उठाएको मुद्दा नै नेपाली साहित्यको मूल प्रवाह बनेको विचार राखेका थिए ।

कार्यक्रमका संयोजक हेम लावतीले समीक्षक समाजको उद्देश्यहरू प्रष्ट्याउँदै स्वागत मन्तव्य व्यक्त गरेका थिए । यस्तै वरिष्ठ संगीतकार दिनेश सुब्बाले भूपालले आफूले काठमाडौंमा बनाएका हजारौँ साथीहरूमध्ये प्रियहरूमा एक रहेको बताउँदै लगभग ३ दशकको मित्रता संझना गरेका थिए । उनले भूपाल राईको मीठो गीतमा संगीत गर्ने अवसर पाएको भन्दै ‘अभागीको शिरैमाथि सलहझैं पीर घुम्छ’ बोलको गीत सुनाएका थिए ।

सिर्जनशील अराजक अभियान्ता कवि हांगयुग अज्ञातले पनि कवि राईसँगको विगतका कवितात्मक यात्राका किस्साहरू सुनाउँदै माहौललाई रोचक बनाएका थिए । उनले वैरागी काइँला, भूपाल राईहरूलाई पढेर नै आफूहरू प्रेरित भएको समेत सुनाएका थिए । बीचबीचमा भूपाल राईद्वारा लेखिएका गीतहरू पनि स्थानीय गायक गायिकाले प्रस्तुत गरेका थिए । कवि तथा गायक नीरज राईले ‘यो तिम्रै माटो हो तिमीले टेकेको’ प्रस्तुत गर्दा भूपाल राईले रेडियो नेपालमा गीत रेकर्ड गर्न खोज्दा सेन्सर बोर्डले दिएका झमेलाहरू बारे बताएका थिए भने आफूले थाहै नपाई खम्बुवान राष्ट्रिय मुक्ति मोर्चाले राष्ट्रिय गान बनाएकोले प्रतिबन्धित भएको बताए ।

कार्यक्रममा सोनम महर्जनले स्कुले हुँदा आफू नाच्ने गरेको गीत स्रष्टाकै सामुन्ने गाउनु पाउँदा हर्ष लागेको भन्दै स्वर्गीय रत्नबहादुर द्वारा संगीतबद्ध र पवित्रा सुब्बाको स्वर रहेको ‘सिरानीले बिझायो कि सिरकैले पोल्यो मेरो तन’ सुनाइन् । गायक राजु आङदम्बेले भूपाल राईको ‘पूर्वै जाने रेल’ले आफूलाई प्रेरित गरेको बताउँदै उक्त गीतमा आफ्नै तुक्काहरू मिसाई सुनाए भने आफ्नै लोकभाका पनि प्रस्तुत गरे ।

यस्तै कार्यक्रममा साब्लाबुङका सम्पादक राजकुमार राईले भूपालका ३ जना दाजुभाइसँग नजिकको सम्बन्ध रहेको बताउँदै जेठा दाइ गोपाल राईको छहरा साप्ताहिकको योगदानको प्रशंसा गरे भने माइला प्रकाश छाङछाको पुस्ता आफूले प्रकाशन गरेको बताए । साझा शृंखलाका संयोजक लालबहादुर गुरुङले हरेक महिना हुने साझा शृंखलाको कार्यक्रमले हङकङमा साहित्यिक गतिविधिलाई बढाएको बताए । हङकङ नेपाली साहित्य प्रतिष्ठानका अध्यक्ष टंक सुब्बाले नेपालबाट हङकङमा आउने वरिष्ठ साहित्यकारहरूले हङकङको आवाजलाई पनि मूल प्रवाहमा ल्याउन सहयोग गर्नुपर्ने अनुरोध गरे ।
सबै वक्ताहरूले खाहोङ राईलाई बधाई दिनुको साथै ‘गीत सागर’मा आम प्रचलित गीत लेखनभन्दा फरक तरिकाले लेखेर गीतकारले चिन्तनसहितको नयाँ गोरेटो बनाएको विचार दिएको बताएका थिए । ‘गीत सागर’ कति आफ्नै भोगाइ, कति देखेका, सुनेका, पढेका कुराहरू समेटेर बुनेको खाहोङ राई सुनाए । गजलकार तथा गीतका विष्णुनन्द चाम्लिङले पुस्तक बारे आफ्नो धारणा प्रस्तुत गरे । खानपानसहित समापन भएको उक्त कार्यक्रमको सञ्चालन कवि मनु कन्दङवाले गरेकी थिइन् ।

Facebook Comments

सम्बन्धित

Leave a Comment