हेलिकोप्टर दुर्घटनामा ७ जनाको मृत्यु

समाचार

एविसि खबर
काठमाडौं, २४ साउन । गोरखाबाट विरामी लिएर काठमाडौं आउँदै गरेको फिस्टेल एयरको हेलिकोप्टर सोमबार नुवाकोटमा दुर्घटना हुँदा ७ जनाको घटनास्थलमै मृत्यु भएको समाचार प्राप्त भएको छ । गोर्खाको सिर्दिवास गाविस –८ फिलिम भन्ने स्थानबाट विरामीहरु लिएर काठमाडौंका लागि उडेको नाइन एन एकेए कलसाइन भएको हेलिकोप्टर नुवाकोटको मदानपुर गाविस ९ को बेतिनी जंगलको भीरमा दुर्घटना भएको हो ।

दुर्घटनामा क्याप्टेन रन्जन लिम्बुसहित कितमान लिम्बु, अज्ञानी गुरुङ, लक्ष्मी गुरुङ, निशा तामाङ, प्रति गुरुङ र उनका पाँच दिनको छोराको मृत्यु भएको प्रहरीले जनाएको छ । नुवोकाटका प्रमुख जिल्ला अधिकारी विष्णुप्रसाद पोख्रेलले भने, ‘सात जनाको मृत्यु भएको छ । लाशहरु टुक्रा–टुक्रा छन् ।’

हेलिकोप्टर गोर्खाको फिलिमबाट दिउँसो १२ बजेर १० मिनेटमा काठमाडौंका लागि उडेको थियो । सो हेलिकोप्टर १२ बजेर ३५ मिनेट जाँदा सम्पर्कविहीन भएपछि खोजी सुरु गरिएको थियो । दिउँसो करिव १ बजे स्थानीयले जंगलमा आगलागी भएको सूचना दिएपछि घटनाबारे आफूले जानकारी पाएको नुवाकोटका प्रमुख जिल्ला अधिकारी पोख्रेलले बताए । त्यसलगत्तै नुवाकोट सदरमुकाम विदुरबाट प्रमुख जिल्ला अधिकारी पोख्रेलसहित नेपाली सेना र प्रहरीको टोली घटनास्थल प्रस्थान गरेको थियो ।

घटनास्थलबाट शव संकलन गरी काठमाडौं ल्याउँदै गरेको नुवाकोटका एसपी देवबहादुर बोहोराले जानकारी दिएका छन् । घटनास्थल राजधानी काठमाडौं र नुवाकोट सदरमुकाम विदुरको मध्य भागमा पर्दछ । पैंतिस किलोबाट कुमरी गाविस जाने सडक पट्टिको जंगलमा हेलिकोप्टर जलेको देखेको प्रत्यक्षदर्शीहरुले बताएका छन् ।

Facebook Comments

Leave a Reply