चलचित्र विकास बोर्डमा दयाको ह्याट्रिक

एविसि खबर

काठमाडौं, १७ असार । नेपाली चलचित्र क्षेत्रमा क्रियाशिल दयाहाङ राईको मंगोलियन अनुहार नभइ चरित्र अभिनयमा अब्बल रहेकै कारण नेपाल चलचित्र विकास बोर्डले यसपटकको उत्कृष्ट अभिनेताको सम्मान तथा पुरस्कार प्रदान गरेकोछ । उनको साथमा बोर्डले नायीका नम्रता श्रेष्ठलाई उत्कृष्ट अभिनेत्रीको सम्मान तथा पुरस्कार प्रदान गरेको छ ।

विगत लामो समय देखि नेपाली चलचित्र क्षेत्रको बक्स अफिसमा निकै राम्रो व्यापार गर्न सफल चलचित्रहरु दिएका दयाहाङको उपस्थितीले नेपाली चलचित्र क्षेत्रमा नया आयामको समेत प्रवेश भएको छ । रुपमा मात्र नभइ सारमा अभिनयको महत्व र पात्रमाथीको न्याय गर्ने क्षमताकै कारण उनले आफ्नौ स्थान सुरक्षित गर्दै आएका छन् ।

नेपाल चलचित्र बोर्डले गत वर्ष प्रदर्शित चलचित्रमध्येबाट विभिन्न विधामा उत्कृष्ट ठहर भएका चलचित्रकर्मीलाई ‘राष्ट्रिय चलचित्र पुरस्कार तथा चलचित्र दीर्घसाधना सम्मान–२०७२’ द्वारा सम्मान पनि गरेको छ । राष्ट्रपति भवन शीतल निवासमा आयोजित कार्यक्रममा राष्ट्रपति विद्यादेवी भण्डारी, सूचना तथा सञ्चारमन्त्री शेरधन राई र बोर्डका अध्यक्ष राजकुमार राईले पुरस्कारसहित उनीरुलाई सम्मान गरे । चलचित्र ‘कबड्डी–कबड्डी’बाट दयाहाङ राईले उत्कृष्ट अभिनेताको पुरस्कार जित्दै हयाट्रिक गरेका छन् । उनको यो उत्कृष्ट अभिनेताका लागि लगातार तेस्रो पुरस्कार हो ।

त्यस्तै उत्कृष्ट अभिनेत्रीको पुरस्कार नम्रता श्रेष्ठले चलचित्र ‘क्लासिक’बाट हात पारेकी हुन् । त्यसैगरी उत्कृष्ट चलचित्र पुरस्कार ‘पशुपतिप्रसाद’ ले जित्दा त्यसका निर्देशक दीपेन्द्र के खनाल उत्कृष्ट निर्देशक चुनिएका छन । उत्कृष्ट नवनिर्देशक अभिनेता समेत रहेका भुवन केसीले चलचित्र ‘ड्रिम्स’बाट जिते । साथै उत्कृष्ट लेखन ९कथा, पटकथा तथा संवादतर्फ ‘पशुपतिप्रसाद’बाट अभिनेता समेत रहेका खगेन्द्र लामिछाने, छायाङ्कनमा ‘ड्रिम्स’बाट पुरुषोत्तम प्रधान र सञ्जय लामा तथा सम्पादनमा ‘क्लासिक’बाट सुरेन्द्र पौडेल पुरस्कृत भए ।

त्यस्तै ‘उत्कृष्ट आदिवासी–जनजाति चलचित्र’बाट गुरुङ भाषाको चलचित्र ‘युम्पो देउराली’ पुरस्कृत भयो । उक्त पुरस्कार आदिवासी–जनजाति चलचित्र महासङ्घका अध्यक्ष अमृत सुनुवारलाई प्रदान गरियो । त्यस्तै ‘चलचित्र दीर्घसाधना सम्मान’बाट वरिष्ठ अभिनेत्री वसुन्धरा भुसाललाई तीन लाख ५१ हजार १११ सहित सम्मान गरियो । पुरस्कृत चलचित्रका विभिन्न विधा गत वर्ष प्रदर्शनमा आएका ५३ चलचित्रमध्येबाट उत्कृष्ट ठहरिएका हुन् ।

Facebook Comments

सम्बन्धित

Leave a Comment