लिम्बू मातृभाषाको पाठ्यक्रम निर्माण सुरु

समाज

एविसि खबर
पाँचथर, ५ असार । लिम्बू मातृभाषामा आधारभूत तह कक्षा ६–८ को पाठ्यक्रम निर्माण समितिले निर्माणको काम सुरुआत गरेको छ । पाँचथरका लिम्बू भाषाविद्, पाठ्यक्रमविद् तथा शैक्षिक अभियानकर्मीका पहलमा निर्माण हुन लागेको पाठ्यक्रमको महत्वपूर्ण चरण आवश्यकताको पहिचानका विषयमा निर्माण समितिले छलफल गरेको छ ।

छलफलमा जिल्लाका लिम्बू भाषाविद्, पाठ्यक्रमविद्, भाषासेवी तथा मातृभाषामा शिक्षा अभियानकर्मी तथा सरोकार भएकाहरुले पाठ्यक्रम निर्माणमा लिम्बू भाषा, कला, संस्कृति, ‘मुन्धम’ आदिलाई समेटिनुपर्नेमा जोड दिँदै पाठ्यक्रम समय सान्दार्भिक र विद्यार्थी केन्द्रित बनाउनुपर्ने सुझाव दिए ।

छलफलमा पाठ्यक्रमविद् तथा भाषाविद् समेत रहेका निर्माण समितिका संयोजक हरिचन्द्र लावतीले चार खण्डमा पाठ्यक्रम निर्माण गर्न लागिएको जानकारी दिए । भाषाविद् तेजमान आङ्देम्बेले लिम्बू भाषामा आधारभूत तह कक्षा ६–८ को पाठ्यक्रम निर्माण गरेर पठनपाठन गरिनुपर्ने बताए ।

भाषाविद् दिलेन्द्र कुरुम्बाङ, मलिसा याक्थुङ्बा, राजेन्द्रकुमार जबेगू, जिल्ला शिक्षा कार्यालयका विद्यालय निरीक्षक शालिकराम काफ्ले, स्रोतव्यक्ति गजाधर ढुङ्गाना, नेपाल शिक्षक युनियनका अध्यक्ष रुपनारायण जबेगू, शैक्षिक गणतान्त्रिक मञ्चका अध्यक्ष गोपालप्रकाश ढुङ्गाना, शिक्षक डिगध्वज लावती, पत्रकार विजयबोध लावती, नेता अग्निप्रसाद तुम्बापो, किराँत याक्थुङ चुम्लुङका अध्यक्ष नरेन्द्रराज केरुङ, ‘मुन्धुम’ अभियानकर्मी सुवास तुम्बापो, विद्यार्थी मधु केरुङ लगायतले पाठ्यक्रम वैज्ञानिक हुनुपर्नेमा जोड दिए ।

निर्माण समितिका सदस्य तथा लिम्बू विद्यार्थी मञ्चका अध्यक्ष अबोध अविरल आङ्बुहाङले बर्से बिदापछि पठनपाठन हुने गरी पाठ्यक्रम निर्माणको काम सुरु गरिएको बताए ।

Facebook Comments

Leave a Reply